سمعت نكتة عجبتني
بتقول حال البلد دي عامل زى حنفية الدش.. كل ما تظبط الميه الساقعة مع السخنة.. أمك تفتح حنفية المطبخ
هي النكتة كانت في الأساس متقاله على إن مصدقنا مبارك مشي وشفيق مسك,بتوع التحرير طلعوا عايزين يمشوه
بس أنا بقول النكتة دلوقتي على حالة جديدة !
ماصدقنا شفيق مشي, وعصام شرف مسك والراجل عمل شو معتقدتش ممكن نشوفه إلا في فيلم لسوبرمان, نزل ميدان التحرير في وسط الناس وقال يوم ما مش هعرف ألبي مطالبكم اللي هي مشروعة هكون معاكم مش في المنصب
والناس بدأت تحس ,لأول مرة يمكن, إنهم بني ادمين وفي حد معبر أهلهم
راح أمن الدولة "الله يحرقهم" فاتحين عليهم المية السخنة واللي الناس محستش بـسخنيتها إلا لما شافوا الدخان طالع من مقرات أمن الدولة
اللي بيحصل ده مقدرش اقول عليه غير إن احنا كنا عايشين فوق شبكة صرف صحي اسمها أمن الدولة
قعدِت تتملي بالبلاوي المتلتلة لحد ما جه اليوم وطفحت وطلعت ريحة قذرة تقلب بطن الواحد
عكننوا علينا الله يعكنن عليهم
لأ وإيه, دحنا مشفناش إلا البلاوي اللي ما لحقوش يعملوا فيها حاجة
قمال لو كنا قرينا اللي في دول كان حصلينا إيه؟
أنا متعملتش مع فرامه قبل كده
بس أختي بتقولي إن كمية زي ديه ما تخدش وقت كتير إنها تتفرم
يعني لو من ساعة ماعصام شرف قال" حرية الرأيي بره الزنزانة" همه قعدوا يفروموا في الورق
الكمية دي تناسب الفترة الزمنية
يعني إيه الكلام ده؟
هل مثلا هم فرمينه من زمان ؟
ولا هل شفيق كان مشغول بـحاجات تانية وماكانش لسة وصل لحتة اما الدولة ديه فـمكانوش فرمينه ؟
ولا هل شفيق كان حاميهم أصلا ؟
ولا هم حسوا من كلام عصام شرف أو مش بعيد سمعوه في الحاجات الكتير اللي أكيد هم مراقبينه منها إنه ناويلهم فعلا؟
حد عنده سؤال محيره تاني نفسه يسأله ؟ D=
زي ماتعودنا من أول الثورة إن ما شاء الله في مجموعة خفيفة الظل كده , أول مالثورة تحقق إنجاز , يطلعوا بـصفحة ضد الإنجاز ده
مبارك استقال راحوا عاملين اسفين يا ريس ورد الجميل لمبارك
وراحوا عند مصطفى محمود ,اللي أكيد بيتقلب في طربته دلوقتي, يقولوا يا مبارك خد دواك كلينا عايزين شفاك
شفيق يا راجل فضل ماسك البلد شهر والحمد لله معملش ولا إنجاز غير إنه رجع شعار الشرطة في خدمة الشعب في نفس ذات الوقت اللي الشرطة كانت بتقول فيه احنا اسيادهم
راحوا عاملين صفحة عايزين يرشحوا شفيق رئيس الجمهورية
وبرده معتقوش مصطفى محمود وراحوا يردوا الجميل عنده
سوألي بقى...
في بكرة مسيرة رد الجميل لأمن الدولة ؟
هل يا ترى في ناس دمها تقيل للدرجة دي؟...
وبرضه عشان ماكُنش سلبية ها قدم شوية اقتراحات بالنسبة لبتوع أمن الدولة :
1- ممكن البلد تعمل شركة أمن قطاع عام تشغل فيها بتوع أمن الدولة دول سكيوريتي كل واحد وشطارته بقى
اللي ينفع في مول مع عائشة عبد الهادي واللي ينفع في فندق
واللي ينفع في بنك ولون ماحدش هيءتمنهم
2- بما إن اغلبهم هيتسجن اشغال شاقة مؤبدة إن شاء الله ممكن نعمل برضه شركة قطاع عام بتاعت طرق , بدل مابهدلنا الجيش وعمل طريق العين السخنة, نخليهم يعملولنا طريق من الاسكندرية لحد اسوان!
آخر حاجة هقولها ... ربنا يكون في عون النائب العام عشان عندي إحساس إنه هيولع في الورق وفي نفسه بجاز
D=
(لو كان حد في غيبوبة أو ماكانش دفع فاتورة الDSL دي شوية مستندات مطلعة ريحة نتنة , سد مناخيرك وتوكل على الله )
No comments:
Post a Comment