حافظوا علي سلمية الثورة (عصيان مدني عام)

المصطلح العلمي للعصيان المدني: " ليس على الفرد محاربة الحكومة، لكن عليه أن لا يدعمها في أي شيء وأن لا يستفيد من دعمها له في أي شيء إن كان معارضا لها"

من الأخر أقفش علي ام السلطة و الحكومة! قولهم خلاص مش لاعب عشان انتوا بتقرصوا الزهر.

ممكن يكون ده حل extreme

٧٣ شاب (كان فيهم ولاد لسه قاصر) ماتوا في متش كورة، أتقفل عليهم الباب و أتسابوا يتصفوا زي الفراخ فالمزرعة.

الحكومة متحركتش لنداءات الأستغاثه إلا بعد ساعة و نص تقريباً.

مجلس الشعب "المنتخب" عمل جلسه "طارئة" عشان يقعدوا علي لا ؤخذه اطيازهم و يطلعوا فالأخر بلجنة تقصي حقائق الله أعلم دي تبقي رقم كام و ببيان يقدم وزير الداخلية للمساءله.

روح امك منك له!!! مش عارفين تتشطروا علي الحمار رايحين تتشطروا علي البردعه؟ (طبعاً كلنا عارفين مين الحمار)

ده طبعاً غير حقوق شهداء الثورة اللي لسة بيتناقشوا يجيبوها أزاي!

انا مش بتكلم عن الفلوس! بتكلم عن القصاص!

محدش فالسلطة أخد قرار extreme

فا عشان كده هناخده أحنا زي ما أتعودنا نجيب حقوقنا بنفسنا

أحنا اللي هنسقط حكم العسكر!!!!!!

مش قدره ألوم الولاد اللي في محمد محمود دلوقتي!

أنا اللي لسه ما ماتليش حد في الثورة و دمي بيغلي

بس محدش قدم لهم حل بديل عن العنف

فا بيطلعوا غيظهم علي العساكر اللي هما برضه اخواتهم

هما ولا عايزين يقطحموا الداخلية ولا حاجة

عشان كده لازم نقدم لهم حل و بسرعة

عصيان مدني يوم ١١ فبراير

يوم الأنتصار الزائف اللي اتخدعنا كلنا فيه

يعني ايه عصيان مدني؟

يعني مش هتاخد حاجة من الدولة ولا هتديها حاجه

لو انت طالب... مش واخد منكم علم

عدد كبير من اتحاد طلبة الجامعات أعلنوا اضرابهم اليوم ده

لو انت موظف هيئه او شركة حكومة ... مش مخلص لكم شغلوكوا

لو انت في شركة مش حكومية و بتقدم خدمات للحكومة... مش مديكم حاجة

قاطع كل منتجات شركات الحكومة (تابع الأيام الجاية هتلاقي قوائم بكل الشركات دي و منتجتها)

قاطع كل خدمات الحكومة! ما تركبش مواصلات حكومية (الأوتوبيس و المترو و مصر للطيران)، ما تدفعش فاتورة المياه و الكهرباء، ما تستخدمش التليفون الأرضي!

قاطع كل السلع المدعمة من الحكومة، بما فيهم البنزين!!!! روح مشاويرك مشي او أشتري عجله، آهه حاجه مفيده لصحتك بدل ما انت عمال تأكل و تربرب

لو عندك محل متبعش منتجات الحكومة أو لو تقدر أقفل خالص المحل عشان لو ما بعتش مش هيخدوا منك الضرائب اللي بيصرفوها علي علاج المخلوع دلوقتي

هنبتديها بيوم ... و هنكمل لحد ما المجلس العسكري و الجنزوري الي متضايق انه ما غيرش الأندر وير بتاعة يتنازلوا عن السلطة اللي محدش ادهالهم اصلاً

عصيان مدني هيشل حركة الحكومة و هيقطع عنها التمويل

كدا كدا التمويل ده مش بيروح للبلد فا مش هتفرق كتير معانا

لو حد قالي "حرام عليكم أقتصاد البلد" هقول لة يلعن ابو شكلك بقي!!!

السنة اللي فاتت في اكتر من ١٠٠٠ مشروع قومي أُقترح من علماء و رجال أعمال مصريين العالم كله بيفخر بيهم، اتحمس لهم ألاف الشباب! المشاريع اترمت في الدرج و الشباب مات!

البلد دي بقالها ٣٠٠٠ سنة بتتسرق من اللي حكمها فرعون كان او احتلال أجنبي.

ما تبقاش تافه و سازج و تصدق ان البلد بتضيع!

٣ شهور بحكومة نضيفة و محترمة تقدر تطلع بقرارات ترجع البلد زي ما كانت، و تخيلها احسن ما كانت في سنة

ده مش كلام شابة طائشة ده كلام كتب الأقتصاد

بالنسبة للناس اللي مؤمنة بالثورة من قبل ما تبدأ و بينزلوا من الأول ما أعتقدش ان إقناعهم بحاجه زي دي مطلوب مني وقت و جهد

بالنسبة للي مؤمنين بالثورة بس مش بيقدروا يشاركوا كتير (الناس الي زي ) ما أعتقدش برضه ان الموضوع ده صعب بالنسبالهم، بس هنحتاج ننشر الموضوع ده بين أكتر عدد من الناس

اما بقي بالنسبة لحبايبي حزب الكنبة

لو قتل الثوار و تعرية البنات و الأنتقام من الألتراس ما أثرش فيك

احب أقولك ان الكابتن ابو تريكة أعتزل الكورة! و الحكومة هي اللي زعالِته فقفش عليها.

و أحب أقولك ان الدوري أتلغي! يعني الخروجة بتاعت متش الأهلي و للزمالك اللي كانت في الكافيه الي فالمهندسين اتلغت.

احب أقولك ان البنك بتاعك ( الHSBC طبعاً ) أتسرق في عز الظهر! يعني ممكن تروح تسحب فلوس تلاقي عصابة دخلة برشاش.

بس فا إحنا هنساعدك و هنرجع الحاجات دي كلها . المطلوب منك حاجة واحدة بس صعبه شوية معلش...

خد يوم ١١ فبراير أجازه و ما تنزلش من البيت، هاتلك كام فيلم لوزاز و أقعد أتفرح عليهم طول اليوم. بس كده

يا نجيب حقهم يا نموت زيهم

يسقط يسقط حكم العسكر

 أُعلن عصياني المدني  بدايةً من 11 فبراير حتي سقوط حكم العسكر

 

- Posted using BlogPress from my iPad