خطة الماتش الجاي

مع إن الناس بقت واعية باللي بيحصل, بس أنا هحاول أشرح بـطريقة بسيطة 

 فل نفترض إن العالم ده عبارة عن ماتشات كورة

من 30 سنة كده الشعب المصري المدرب بتاعه مات فـجبنا مدرب جديد

وبعد كام ماتش كده الشعب المصري اتخبط جامد في راسه ودخل في غيبوبة من الخبطه  بس فاق منها الحمد لله

بعد تلاتين سنة آه, بس زي مالدكاترة بيقولوا "احنا كنا فين وبقينا فين"

ولما فاء , اكتشف إن كان في ناس مش عايزاه تفوق, مرعوبين من اللي ممكن يعملوه

ولقى إن مدربه واحد من الناس ديه 

عارفين إن الفرقة دي لو أخدت فرصتها ممكن تكسب كاس العالم

 

بس عشان تكسب كاس العالم لازم تكسب الدوري الأول

والدوري بتاعنا مش ضعيف

فيه فرق تقيلة

وفيه لعيبة اجانب جامدين

وفيه رجال أعمال بتصرف على النادي بتاعها

ده غير الحكام اللي بياخدوا رشوة

والمعلقين اللي بيشتغلوا للفرق 

والجمهور اللي بيرمي طوب علي أللعيبة

من ال آخر الدوري سايب

ابتدينا أول ماتش يوم 25 يناير

اللعيبة كانت نازلة ومش عارفة إيه اللي ممكن يحصل اليوم ده 

أصلا اللعيبة كانت نازلة ومش عارفة باقي الفرقة جاية ولا لأ

ولعبنا ماتش مش هينساه التاريخ 

مسكنا الكورة فنص الملعب 

وخلينا اللي قدامنا بيلف حوالين نفسه 

لحد ماحس نفسه بيخسر راح نازل ضرب فينا 

وطلعنا بتعادل, بس معنويا احنا كسبنا أكيد 

وجه الماتش اللي وراه يوم 28 يناير لقينا الناس جهزلنا

عرفوا إنهم مش هيقدروا علينا 

راحوا ابتدوا الماتش ضرب من أولها

والحكم عامل نفسه أعمى

والمذيع كان بيعلق على ماتش تاني

وبالرغم من كل ده كسبا

الفرقة انسحبت

بس جمهورهم مسكتش 

نزلوا الملعب عشان يضربونا

لقوا جمهورنا وقفلهم زي السد

ناس كتير ماتت وناس أكتر اتعورت

بس الفرقة فيها احتياطي جامدين

الفارقة كانت بتلعب بالشباب بتوعها

حققوا اللي ماكانش حد يتخيله

بس الماتش الجي مهم جدا جدا

ولازم نلعبه صح

بس الفرقة ملهاش مدرب 

فبدأت اللعيبة تتخانق مابينهم إزّي يلعبوا الماتش الجاي

في اللي بيقول احنا نلعب زي ما لعبنا وكسبنا: انزل بالشباب يمسك الكورة فنص الملعب لحد ماينسحبوا

وغيره قال: لا يا جماعة, احنا اتضربنا جامد قوي, ماتيجوا ننسحب, كفاية علينا المركز التاني

وفي ناس قالت: طب ليه ماننزلش لعيبة خبرة تلعب معانا؟ منهم اللي كان محترف بره  و منهم اللي كان مصاب , بس وجودهم معانا هيساعدنا نسيطر عالماتش

ماحدش عارف ليه اختلفوا 

بس اللي أكيد إنهم مش هيكسبو قللى لما يتفقوا

الكاس بقى قدام عنينا

ماتخلوش حد يسرقه منينا

احنا محتاجين نسمع بعض في الملعب 

ومحتاجين نبص على بعض, مش عالجون

ومحتاجين نقفل التلفزيون ونروح الستاد

ومحتاجين نعمل حساب الحكم ونعرف إزّي نكسب غصب عنه

الفوز اللي قبل كده مالوش معنى لو ضيعنا الكاس

والكاس مش هييجي بالتسرع 

مش هييجي طول ما احنا داخلين الماتش واحنا متقسمين 

احنا محتاجين ناخد قرار 

ونتفق على خطة الماتش الجاي