إيه بقى؟

إيه الحكاية بقى؟

أناأقولك

 أنا اسمي نسمة

عندي 22 سنة

ساكنة فحته حلوة اسمها ميدان المساحه في الدقي

عندي عربية وبتطلع عيني في الركنه

لسة متخرجة من تجارة انجليش جامعة القاهرة 

وقبلها كنت فمدرسة القلب المقدس, يعني عندي لغات

بشتغل فشركة مصريه بس كويسة

باخد مرتب مش قوي يعني

يادوب بيأضي البنزين والخروج وشوية تافهات

وعالفكرة مشتغلتش بـواسطة 

أنا قدمت عالنت وهمه كلموني واختاروني  

بس برده مش عشان سواد عيوني 

  بتاعي كويس إلى حدن ماه CV عشان ال 

 

مليش في السياسة خالص بقى

ومش مقتنعة بالبارادعي من اساسه

بس ربنا اداني نعمة العقل

وداني برضه نعمة التعليم الكويس  وإن كانت حاجة نادرة جيدا في البلد دي

وداك إنت ياللي بتقرأ نفس النعم دي

نحط ده على ده

 نقدر نجمع إن البلد حالها بيسواء كل شوية أكتر

بيسوا إزّي يعني؟

حوادث بلعبيط, ناتجة عن جهل واستهتار

أو ناتجة عن واحد اتخنق موت عيلته وموت نفسه

وفجأة البلد كلها بقت مختلة عقليا

انفجار فكنيسة عمله مختل عقلي

اللي بيولع فنفسه مختل عقلي

اللي بيشجع الزمالك مختل عقلي =D

ماشي... البلد كلها مختلة عقليا

ماهو أصله مش بنستورده من الصين ده كمان 

ده local

عايزة إيه أنا بقى؟

بغض النظر عن الشوكلاتة وامينة شلبية ولكي سيدتي

البلد مولعة

بيتقال عليها حاجات كتير:

  , ثورة 25 يناير , ثورة الغضب  , ودلوقتي جمعة الغضب

وانا هاموت  وانزل الشارع

ونفسي كل الناس تنزل الشارع

مع إني عايشة عيشة كويسة 

خد معايا كده كام ثانية واطلع فوق كده وبص تاني على اللي كتبته

 وحاول تشيل جملة واحده

شيل الدقي, أو عربية أو لغة أو شغل أو خروجات أو حتى شيل تفاهات

هتلاقي الحياة صعبة اوييي

ولا إيه؟

حاول كده تتخيل كام واحد فمصر عنده ربع اللي عندك!!!!!!!

ربنا مبيديش حد نعمة إلا لما يحمله مسؤليتها 

 وانا عندي نعمة التعليم

ونعمة الثقافة 

نعم اتحرم منها ناس كتير

مش قادر يفهم حاجة غير إنه اتخنق 

مش قادر يفهم حاجة غير إنه نفسه ينام شبعان

فياريت قبل ماحد يقولي "أصلي مليش في السياسه" 

ولا يقولي "هي المظاهرات هي اللي هتجيب نتيجة يعني؟"

فَكر بس

هل الناس دي تستاهل إن احنا , اللي عايشين كويس, نتعابلهم؟ 

البلد فيها كام ظابط؟ وفيها كام مواطن مسحول, بايع اللي قدامه واللي وراه؟

تفتكر لو كل الناس دي وقفت مع بعض, مش هنقدر على كام ظابط وعسكري؟

؟تفتكر لو الكام ظابط وعسكري دول جريوا, مش هنعرف نجيبه من قفاه

مش هنعرف نغير البلد دي ؟

فَكر...

ولو الإجابات كانت "لأ"

يبقى عليه العوض ومنه العوض في "خير جنود الأرض "ا

 

يا رب كفاية ظلم