الشعب الأوفر

في ايه يا جدعان؟ مالكم؟
أمال لو اسرائيل كانت دخلت سيناء تاني كنتم عملتم ايه؟


و ايه ياعني الأخوان كسبوا؟
حقهم!!


ده أنتم ناس غراب قوي الصراحه
الأخوان، يوم ما كان الحزب الوطني خايف علي مصلحته و بيزور، كسبوا يجي تلت البرلمان...
متوقعين ايه لما الحزب الوطني بقي بخ؟!!


لَأ بجد انتم شعب اوفففر


للأسف النخبه المتعلمه المثقفه اللي ساكنه فالعاصمه طلعوا ولا مثقفين ولا هباااااب! كتكم نيله في خبتكم! عماليين تولولوا زي الولاياه فالأرياف


بتولولوا علي ايه يا لولو انت و هيا؟


عشان نبقي وضحين بس، أنا لم و لن انتخب الأخوان، لأن "فكرهم السياسي" مش مناسب ليا.
قلت ايه أنا دلوقتي؟ فكرهم السياسي.... هو في كام واحد في مصر فاهم يعني ايه سياسه و فكر سياسي؟ مليون؟ اتنيييين مليون؟ ده إذا الموظفين المحترمين اللي عندي فالشركة كتير منهم نزل انتخب عشان الغرامة، عايزين المواطنين الغلابه يفهموا هم المفروض ينتخبوا مين؟


عرفين ليه الأخوان يا ساده عمالين يكتسحوا كده؟
عشان جماعة الأخوان المسلمين مش سياسه و بس...
الأخوان ليها جانب أجتماعي كبير و مؤثر، عمرك ما هتتخيل حجمه إلا لما تنزل عشوائيات او أقاليم.
الأخوان بقلهم ٨٠ سنه شغالين في مصر، من مرسي مطروح لحد اسوان، عندهم مقر في كل محافظه بينفذوا من خلاله انشطه اجتماعيه و تنماويه بحجم صعب تتخيله، بعضها بيوبقه بأسم الجماعه و بعضها بيوبقوا افراد من داخل الجماعه عايزه تعمل حاجه مفيده للناس.
نيتهم خدمة الناس ولا خدمة الجماعة.... الله وحده اعلم، بس وجود الجماعة مع الناس فالشارع و فالمحافظات و الأقاليم هو ده اللي يخليهم يكسبوا يا بهوات، مش شويت خضار و دعايه بتتوزع عالباب....
الناس كانت رايحه مش عارفه اسم حد، بس هي عارفه شعار الحزب و رايحين يعلموا عليه. ولا يعرفوا ايه القائمة دي اصلاً ولا حتي أسامي مرشحين الفردي!
بس هما عرفين الجماعة و عرفين أزاي بيتعملوا مع الناس و أزاي هم ديماً موجودين معاهم و فنفس الوقت ناس " بتعرف ربنا" و هي دي ثقافة الأرياف عندنا. هتقول عليهم جهله و مش فهمين... سعادتك عملت ايه عشان تمحي أميتهم؟ عملت ايه عشان توفرلهم حياه احسن؟ .............
عملت ايه عشان الست ام حسنين تنزل من بيتها عشان تنتخب الحزب بتاعك؟
من جد وجد و الاخوان جدوا فا وجدوا... ايه مشكلتكم بقي؟


و بعدين يعني معلش، انتوا عايزين مثلاً الكتله المصريه هي اللي تكتسح؟ ده علي أي اساس؟ إذا الليبراليين في مصر ما يعدوش ١٠٪ ؟
عايزين الثورة مستمره تكتسح؟ إذا الناس اللي بتنزل مليونيات ، و اللي بيكون في فوسطهم أخوان و ليبراليين، ما بيعدوش ٥ مليون؟
عايزين الأحزاب الوسطيه زي الوسط و العدل يكتسحوا و دول اصلاً لسه أحزاب تعتبر نسبياً صغيره و معندهاش الدعم المادي الرهيب بتاع الأحزاب التانيه؟


اللي مش عجباه الأنتخابات دي و بيقول مش نزيهه ، هسألك سؤال....
نزلت أنتخابات ٢٠١٠؟
أنا نزلت!
روحت ٣ لجان علي ما لقيت اسمي فواحده فيهم
كنت خايف أنتخب فالقسم عشان كنت هنتخب ضدد الحزب الوطني
الساعة ٩ لما دخلت اللجنه الفرعيه، ما كانش في غيري بينتخب وماكانش في حد ماضي غيري فالكشف
في واحده منتقبه و أنا دخله و أنا طلعه كانت واقف تقول للظابط اللي معاه الكشف عالباب " أنا اسمي مكتوب عندك آهه، ممكن ادخل؟" يقولها مش هتدخلي
الأحياء و الأموات كان صوتهم بيتزور
و كان الواحد ممكن ينتخب في لجنه و يروح ينتخب فالقسم تاني
و ما كنش بيتوزع خضار و بطاطين... كانت فلوس علي طول كده عيني عينك
زمايلي فالشغل افتكروا أني متعوره و حطه علي صباعي مكروكروم
اليوم ده دعيت ربنا يخلصنا من الظلمه دول، و كان اقصي تخيل مخي جابه لرحمة ربنا أن مبارك يموت موتة ربنا


انتوا بتتكلموا في ايه بقي؟
ناس سلبيه صحيح!!!


معلش بقي اللي هيقول "لو الأخوان مسكوا هنسيب البلد" هقول له يلا مع السلامه
لو الأخوان مسكوا البلد ...
معلش ولا أنا و لا أنت و يمكن ولا الاخوان نفسهم عارفين هيعملوا ايه لو مسكوا البلد...
و بعدين في حاجه يا حضرات اسمها "المعارضه"
لو ما عجبنيش شغلهم هنضم لحزب معارض و هطلع عين اللي جبوهم
عشان أنا بحب البلد ديه عشان دي بلدي، 
مش بحبها عشان ال life style بتاعي فيها، فا لو اتغير هسبها و اشوفلي غرها


بطلوا سلبيه و ولوله!
أنا عن نفسي شايفه ان الأخوان معلمين سياسه، يبقي حمااااااااار كبيييييييير اللي ميحطش عينه في نص راسه و يتعلم منهم عشان الأنتخابات اللي جايه، اللي احتمال كبير تكون بعد انتخابات الرئاسه!




اللهم ولى امورنا خيارنا ولا تولى امورنا شرارنا
اللهم من اراد بمصر خيرا فرزقنا خيره ومن اراد بمصر شرا فاكفنا شره


و تحيا مصر يا عم :)








- Posted using BlogPress from my iPad

ملزمة ليلة الانتخابات

بسم الله الرحمن الرحيم


مبدئيًا كده عشان نبقى متفقين... أنا ولا درسه سياسة, ولا أنا ناشطة سياسية ... في واقع الأمر أنا بكرة السياسة 
المعلومات اللي  هكتبها هنا واللي ممكن تفيدكم , هي عبارة عن اجتهاد شخصي مني
من الآخر.... أنا هحاول اديكم مراجعة ليلة الانتخابات . بس لو الدكتور جاب سؤال صعب في الإمتحان أنا مليش دعوة :D


ليه أنزل انتخب؟
في انتخابات مجلس الشعب 2010 كان هدفي واضح وصريح ... هانتخب أي حد مش وطني! اخوان بقى بتنجان ماكانش فارق معايا 
2011 بقى الوضع مختلف 
مجلس الشعب اللي هينتخب في 2011 الى حد كبير هيكون بيمثل بـشكل واقعي جميع اطياف الشعب المصري! كل ممثل "المفروض" هيبقى بيعبر عن مشاكل الجزء من تركيبة الشعب المصري اللي هو بيمثلها وهيحاول يلاقي حلول للمشاكل دي
ولانه زي ما ها واريكم كمان شوية, الشعب المصري مكون من تركيبة خزعبالية 
فا في ناس  كتير مش عارفة تحدد مكانها في التركيبة ديه 
, ولو حددت مكانها, بتبقى مش عارفة مين من الاحزاب والأفراد مترشح عن نفس المكان الخزعبالي ده 


الانتخابات بتبقى عاملة ازاي؟
النظام السنة دي مختلف عن قبل كده بس أحسن بـكتيير
النظام إن إنت هتنتخب شخصين, واحد بيمثل عُمال أو فلاحين (على حسب المحافظة فيها عُمال ولا فلاحين) وواحد بيمثل فئات ... اللي هما كل الناس ماعدا العُمال والفلاحين =D 
الشخص ده يوم مايغلط (مايحققش اهداف الدايرة بتاعته, ياخد رشوة ...) إنت كا مواطن  هتحاسبه هو شخصيا
في أفراد بيكونوا تابعين لاحزاب بس نازلين فردي, فـا هتلاقيه حاطت شعار الحزب عادي 
الأفراد حاول تقرا لهم أي حاجة: بيشتغل إيه؟ افكاره عاملة ازاي 
واللي تعجبك افكاره اختاره 
وعلى فكرة في أزمة في العُمال في البلد فـممكن تلاقيك بتنتخب حد عُمال من غير ماتعرف ده مين أصلا :D 
 

والنظام برضه  إن إنت تختار حاجة اسمها "القائمة"
القائمة دي بتبقى بإسم حزب )أو تحالف احزاب(
الحزب هو اللي بيحط أعضاء منه جوه القائمة وهو اللي بيختار ترتيبهم 
 هنقول مثلا إن الدايرة بتنجان  ليها 12 كرسي في البرلمان , 2 لأفراد أو الفردي, و10 قائمة 
هنقول إن حزب الطماطم كسب 50% من أصوات الدائرة, فـكده يبقى كسب 5 كراسي من ال10! مين اللي هيقعد فيهم؟ أول 5 في القائمة بتاعته اللي هو محضرها من قبل الانتخابات زي  ماهو عايز واللي إنت وافقت عليهم لما اخترت القائمة كلها على بعض
إنت بتختار القائمة مش الأشخاص اللي جوه القائمة. أو بمعنى اصح, إنت بتختار الحزب! 

طب معرفش الاحزاب إيه؟
طيب مبدئيًا دي خريطة ممكن (مش أكيد) تقدر تساعدنا :D
(أنا مش عارفة مين ابن الحلال اللي عملها بس أنا بدعيله كتير )

استعنا عالشقى بالله :D
دي خريطة بتوضح جميع التيارات السياسة اللي لازم أي مواطن مصري مهما كان مكانه في التركيبة الخزعبالية هيلاقي واحد من الاحزاب دي بيعبر عنه وعن افكاره 


المحور الرأسي (Y Axis) 
 ده بيمثل في مصر مدى انتمائك لفكر من اتنين: الإسلامي أو الليبرالي
اقصى حاجة في الفكر الاسلامي موجودة دلوقتي ممكن ناخد ليها مثل... السعودية
الستات تنزل الشارع بـعبايات, المحلات تتقفل وقت الصلاة , اللي بيسرق ايده بتتقطع ....
في واقع الأمر كل الكلام ده مش تشدد, دي طريقة المعيشة وقت الرسول صلى الله عليه وسلم 
ممكن حد يبقى شايفها مثالية ليه, ممكن حد خزعبالي يبقى مرعوب منها! عادي جدا
اقصى حاجة في الفكر الليبرالي موجودة دلوقتي وممكن نأخد مثل ليها هي فرنسا 
من الآخر اللي عايز يعمل حاجة يعملها, اللي عايز يعمل معبد لبوذا يعمل, اللي عايز يلبس ست ويمشي في الشارع يلبس....
 في واقع الأمر الكلام ده مش تحرر قوي, الفكرة إن ثقافة الناس هناك خلتهم يسمحوا بـحاجات زي دي تحصل من غير متضايقهم 
ممكن حد ييبقى حابب انه يبقى في مجتمع متحرر كده, وممكن حد خزعبالي برضه يبقى حاسس إنه مستحيل يعيش في مجتمع كده! عادي 

المحور الأفقي (X Axis)
ابقة كدابة لو قلت إني فاهمة :D
بس على حدعلمي البسيط إن التيار اليميني ده بيبقى دايما متشدد في أي حتة في العالم, في الأغلب بيبقى تشدد ديني
والتياراليساري ده بيمثل الفكر الإشتراكي متشدد برضه ... اللي أهم مبدأه هو مبدأ توزيع الثروات (اللي حصل في عصر جمال عبد الناصر) كل الناس تكون بتاخد نفس الدخل والمسواه


دي اللي تقدر تقول عليها Extremes
لو إنت شخص اكسترم في أي حاجة من الحاجات ال4 اللي قلتها (اكسترم  دي مش حاجة وحشة, ده جزء من التركيبة الخزاعبالية) دور عالاحزاب اللي بتمثيلك عند الاكسترم ده في الخريطة   
لو إنت مش اكسترم, دور عالحاجة اللي حاسسها فيك أكتر وادخل لنص الخريطة 


يعني مثلا في الفكرالاسلامي الديني
لو إنت ديني قوي ومتشدد للدين  , اختار البناء والتنمية أو النور 
لو إنت ديني بس مش متشدد ممكن تروح لحزب الاصالة أو انزل للحرية والعدالة 


وهكذا....


لو فضلت تدخل في قلب الخريطة, يبقى إنت شخص وسطي!
يعني ديني بس ماعندكش مشكلة يتعمل حفلة لعمرو دياب التذكرة بـ300 جنيه,
أو ليبرالي بس ماعندكش مشكلة إن عمرو خالد يعمل دروس دين في المساجد

آخر حاجة... التحالفات الحزبية 
إن كذا حزب, مثلا معهمش فلوس, أو ماعندهمش أعضاء كفاية,أو لأسباب سياسية عامةً , يدخلوا مع بعض بـقائمة واحدة, بيكونوا قعدوا مع بعد قبلها اتفقوا مين من أنهي حزب فيهم هيبقى رقم كام!
التحالفات اللي أنا عرفاهه واللي موجودة في الخريطة فوق هي:
الكتلة المصرية  - ليبرالي 
الثورة مستمرة - ثوري إشتراكي
التحالف الديمقراطي (الحرية والعدالة) - ديني + وسطي 
 التحالف الاسلامي - اسلامي سلفي
  
من أبرز الاحزاب اللي نازلة بـقوائم لوحدها من غير تحالوفات هم حزب الوسط و حزب العدل 

  متسألش حد بقى انتخب مين... شوف الحزب اللي يناسب شخصيتك الخزعبالية
لإن الحزب ده في الآخر, لما يكون قاعد  في مجلس الشعب , وحد مثلا يقترح قانون هيضايق شخصيتك الخزعبالية , (أين كان إيه هو) هيقوم يقول "اعترض" فا القانون اللي هيضايق حضرتك مش هيتعمل
مهما كان الحزب قوي ... مهما وزع خضار وفاكهة ... ومهما صرف على دعاية... المواطن اللي هارش الليلة صح هينتخب برضه الحزب الخزعبالي اللي مرتاحله

=D شفتوا سهلة ازاي  


آخر حاجة بقى ابوس ايديكم 

الكباتن دول عايزين نعمل معاهم الواجب! :D 


   

دليل المواطن القلقان من نزول الميدان

عزيزي المواطن المصري
اليوم هو يوم مليونية الحسم
مشاركتك ليست فقط واجب وطني، بل هي ايضاً واجب انساني
لأنه لو سعادتك لسه علي الأقل مش متعاطف مع معتصمي التحرير بعد القتل العلني اللي اتعرضوله، يبقي احب اقولك الخبر السعيد... انت ما عندكش اي نوع من انواع الدم :)


بالنسبه للناس اللي لسه تُحسب علي فصيلة البني أدمين، اللي عايزين ينزلوا الميدان، بس أهاليهم خايفين، او هم نفسهم خايفين، و معاكم كل الحق فأنكم تخافوا، فا احب اقول لكم ان
الميدان أمان
لما تلاقيك هتتكعبل في طفل ملون وشه علم مصر تعرف ان الميدان أمان
لما تكون جعان و تلاقي بدل عربيه الكشري عشره، و تلاقي "كبدة الكابتن" و تلاقي تفاح بالكاراميل ( اللي هو فالعادي مش بلاقيه في حته اصلاً) تعرف ان الميدان أمان
لما تكون ريحة البطاطا مغطيه علي ريحة غازات الأمن المركزي، تعرف ان الميدان أمان


ايوه في حرب بكل معني الكلمة في شارع محمد محمود و منطقة باب اللوق
بس غير كده، كله فالسليم


أنا اهلي ما كانوش بيوفقوا انزل الميدان. بس بعد مناورات و مشاوارات و إقناع بأن خوفهم عليا طبيعي بس over حبيتين، قدرت أني ابقي بنزل الميدان


اصعب خطوه انك تاخد موافقة النزول، بعد كده كله حاجه سهلة و عبيطه


هحاول اكتبلكوا زي tips & tricks اتعلمتها


١- التجهيز قبل النزول
- البنات: بطاقتك وفلوسيك في جيبك، موبيليك في ايدك. سيبي باقي الشنطه فالبيت :D
ممكن لو شنطه cross صغيره لو عايزه
- بناءً علي الحداث اللي بتتغير كل ساعه، حدد تاخد إيه معاك: نضارة بحر ولا ماسك جراحه ولا كل حاجه بقي (خوذه، نضارة غطس و مسك تنفس)
- اعرف الضرب بيحصل فين و تدخل منين عشان تتفاداه، حالياً ابعد مداخل عن محمد محمود هي كبري قصر النيل و م. عبد المنعم رياض.
ودي خريطه بتوضح وضع الميدان

٢- دخول الميدان:
- لو خايف قوي يعني ممكن تشوف مسيره رايحه عالميدان و ادخل فيها. لا قدر الله لو في اعتقلات او حاجه، مش هيهجموا علي مسيره. و احطياطي لو عايز ممكن تمشي في نصف المسيره، لو اتضربت من قدام اجري علي ورا يا معلم، اتضربت من ورا اجري علي قدام ؛)
- ممكن تروح بالمترو بدل ما تمشي كتير
- ممكن تروح بتاكسي هيوصلك لأقرب حته يقدر يوصلها
- لو حد طلب منك تتفتش عالباب معلش طاوعه، من حقهم يخافوا مين داخل و معاه إيه. البنات بيوبقي فيه اغلب الوقت بنات تفتشهم، لو ما فيش محدش هيفتشِك.


٣- تعمل ايه جوه الميدان
- لو رايح تساعد: المستشفيات بتبقي محتاجه حد يساعد، تنظيف المستشفي، توزيع اكل علي المصابين، توصيل ادويه من مستشفي لمستشفي تانيه.
- لو رايح تتفرج، لف الميدان، هتلاقي ناس كتير واقفه بتتكلم مع بعض، ارمي ودن كده شوف بيقولوا ايه، شوف مين اللي فالميدان، من اي طبقه او دين او انتماء سياسي
لو رايح تتفسح: هتلاقي كل اللي نفسك فيه. مش بعيد تلاقي قريب مراجيح المولد علي رأي واحده صاحبتي :D


المهم ان انت لو بتأيد الثوره... تنزل تأيد فالميدان
لو لسه مش فاهم الناس اللي هناك دي عايزه ايه... تنزل تشوف و تحكم فالميدان
لو مش مقتنع بيهم... تنزل تتناقش فالميدان


المهم تنزل
عشان صدقني، بعد ١٠ سنين ربنا يدينا و يديلك طولة العمر عيالكم لما يدرسوا الثوره فالمدرسه، هيجوا يقلولكم انتوا شاركتوا فالثوره ازاي؟ يا امه هتحور عليه، يا امه هتقوله الحقيقه ....
أنك ما شاركتش في اعظم حدث حصل في تاريخ مصر =)

- Posted using BlogPress from my iPad

حداد

حداد علي ارواح الناس اللي ماتت:






ماتت بسبب اكل مسرطن و لحوم فاسده
ماتت في طابور العيش و انابيب البوتجاز
ماتت في اوتوبيس مقلوب و حادثه قطر و غرق عباره
ماتت في مستشفي حكومي بتجيب امراض اكتر ما بتشفيها
ماتت في نص البحر و هي بتدور علي شغلانه تأكل عيش
ماتت في عقار منهار تصريحه متاخد بالرشوه
ماتت عشان عايشه في مكان لا إسعاف ولا مطافي تقدر توصله
ماتت عشان مش لاقيه ثمن الدواء
ماتت عشان جهلها مقدرش يساعدها تتصرف ازاي
ماتت بره بلدها و هي بتدرس في بلد شعبها بيحتقرها
ماتت فالسجون عشان قتلت صهينه بيهينوا علم بلدهم عالحدود
ماتت في الأقسام و المعتقلات عشان حاولت تعارض النظام
ماتت في خناقه بعد متش كوره عشان اتربت جواهه كره لأخونهم العرب
ماتت قبل ما تعيد راس السنة عشان تبقى تجرها للفتنة الطائفية  
ماتت بتدافع عن بيتها و عرضها من بلطجيه محمين من الشرطه


ماتوا ضحية الفساد و والجشع و الإهمال


و اخيراً... شهداء الثوره
شهداء ميدان التحرير و ميدان الاربعين و كل محافظات مصر


حداد علي أرواحكم جميعاً
ضحيتوا بروحكم عشان يتقال عليكم " و اخيراً"
عشان مفيش مصري يموت او يتهان عشان اكل و لا دواء و لا سكن و لا طموح بعد كده
ربنا يعينا و نقدر نكمل اللي بدءتوه


أنا لله و أنا اليه راجعون

سكتناله...

عزيزي القارئ

تحية طيبة وبعد ,

انني أعلم إنه قد مضي حقبة من الزمن منذ ان كتبت عما يدور ببلدي الحبيبة , مصر

وكان السبب في ذلك ظروف شخصية كانت تحوم حول حياتي  فـلم يكون لدي الرغبة في التعليق حتى لا أزيد على طين حياتي بلة.

ولكن ...

أيـــــييييييــــــــــــــــــــه؟

سكتناله دخل بحماره؟؟؟؟

ماتش كورة, قلت معلش بتحصل مع أحسن الفرق 

السلفيين عايزين أختهم كامليا, مش وقته بس ماشي احنا في عصر الحريات 

الأقباط احتلوا ماسبيرو, مش مشكلة الناس كنايسهم بتتهاجم وعايزين يحموها

تضامن مع فلسطين , على عيني وراسي, لو احنا ماتضمناش مين هيتضامن 

لكن فتحي سرور وزكريا عزمي ياخدوا براءة من حكم مدني, والجيش بيعتقل الشباب و يتحكموا عسكري 

لأه!!!! كده مش بيس 

خرجتوا الواحد عن شعوره!

لا مؤاخذة يعني:

لو فتحي سرور وزكريا عزمي كسبهم كان "مشروع" يبقى مين اللي كان واكل البلد إن شاء الله  ؟

ابويا؟ ولا مصيبة ليكون أنا؟

أنا باليل وانا نايمة بأنزل الشارع أعمل كسب غير مشروع ولما أصحى الصبح الاقي الكسب بتاعي عالسرير!!!

ممكن قبل ما أفضفض كده تتفرجوا عالفيديو ده؟

يضحَّك صح؟ :D
هو طبعا ده برنامج ترفيهي كان بيجي على قناة mbc 
 للأسف بقى أنا اكتشفت إن احنا عاملين زي اللي بيلعبوا اللعبة ديه :S
بقالنا 30 سنة محطوطين في"دويخة" و فجأة وقفت 
كل واحد بقى فك الحزام وطلع يجري زي الأهبل وهوا مش عارف رايح فين 
اللعبة دي كان فيها ناس كتير قوي 

كان فيها جيش يا عيني لا حول له ولا قوة, لو حد نفخ في وشه هيطلع الكام دبابة اللعبة اللي عنده يحارب بيهم 
فجأة بقى الجيش ده لقى في ايده مسئولية بلد مش عارف يشغلها إزّي 
بقى عامل زي اللي أول مرة يشوف ريموت تلفزيون وعمال يجرب كل الزراير يشوف هتعمل إيه!
 أنا قلت من الأول إن الجيش معندوش خبرة ادارية, عشان كده قلت لأ في الاستفتاء عشان كان كده هيمشي أسرع! بس ماعلينا, اللي حصل حصل , مش هنيجي قبل الانتخبات ب 3 شهور نشيله أكيد !  بس لما يبتدي يهبل ويدوس على زراير غلط, لازم حد يفهمه كده بالزوق إن الزرار ده غلط يا بابا, ماتدسش عليه تاني
وبعدين ماهو ما أنيل من ستي إلا سيدي! مجلس رأسي إيه واحنا كل مانتناقش في حاجة ونختلف نبقى عايزين نولع في بعض؟


   
كان فيها شباب كان اقصى طموحه إنه يشترك في ستار اكاديمي ولا إنه يتصور مع هيفاء وهبي 
فجأة لقي نفسه ليه قيمة وصوت بيتسمع! لما صدق بقى! 

مظاهرات من شباب عاطل قدام هيئة البترول عايزين يتعينوا (دي أنا شفتها بـعينيَّ)  
يعني هو مبارك ونظامه كان مخبي الشغل في درج ولما تنحى بقى قلنا هنفتح الدرج ونوزع التركه؟ 
  ماتصبروا عالناس شوية؟ بقالكم 3 ولا 5 ولا 10 سنين عاطلين, مش قدرين تصبروا سنة؟  
وخد من ده كتير 
أنا مش ضد المظاهرات, ده في حاجات لولا المظاهرات ماكنتش  حصلت , زي المعتقلين في سوريا! لولا المظاهرات كان زمان السفارة هناك ولا  عبرتهم!
لكن نراعي الناس يا جماعة برضه!
أنا ماشفتش اللي حصل بالضبط قدام السفارة, بس أكيد في حاجة حصلت! في حد استغل الموقف! أصل الموضوع مش هياخد أكتر من طوبة ولا ازازة مولتوف عشان يولع الدنيا زي ماحصل! 
مظاهرات فلسطين كانت شغالة من الجمعة! وطول الصبح يوم الحد! خلاص الدنيا ازمت والجيش اتخنق, نمشي!
عايزين تنزلوا العلم!!!!
أنا مش هنسى أول يوم شغل بعد الثورة وانا معدية قدام السفارة ولقيتهم شايلين العلم!
قلبي فرح ساعتها! قعدت اقول آه يا جبناه!
لكن يوم الانتفاضة لو حد تخيل إنهم ممكن ينزلوا العلم يوم عيدهم يبقى غبي ويستاهل يتحبس!
هما خسرانين إيه؟عاملين حفلة فوق وآخرمزاج واحنا عمالين نضرب في بعض تحت
يعني الجيش يعمل إيه؟ يسيب الناس تخش السفارة ؟ 
ساعتها إسرائيل تروح فالأمم المتحدة تقولهم محتاجين قوات من بتعتنا هناك يحمونا؟
حاجة حلوة إن كل الشباب بقى دماغه في السياسة بدل التفاهة اللي كنا فيها 
بس برضه كل حاجة وليها قواعد وحدود
وماكانش لازم نخلي حد يستغل الموقف ويولعها ضدنا 



 كان فيها اسلاميين, و يدخل فيها سلفيين والغير سلفيين
أمن الدولة مطلع عينهم! اشي اعتقالات, اشي تعذيب , اشي الشيخ فلان ممنوع يدخل مصر
فجأة لقم أمن الدولة بخ (مع إنه مش بخ قوي,  لسة الأمن الوطني مش منظم ) بقم عايزين يقلبوا مصر اسلامية!!!!
اسلامية إزّي يا جدعان والبلد  دخلها الرئيسي السياحة؟
  السياحة اللي بتجيب أجانب ينزلوا البحر في شرم الشيخ 
السياحة اللي بتجيب عرب شغالين في شارع الهرم الله ينور
عايزينها اسلامية ماشي, كل واحد من حقه يحلم بـحاجة, بس مش هنودي البلد في 60 داهية! اصبروا يا جدعان البلد تقف على رجلها وبعد كده ربنا يسهل
بس أنا في حاجة في المجموعة دي مش فهماها!
هما ما بيشاركوش أو نبتدي نسمع صوتهم إلا لما يحسوا بـخطر 
يعني مثلا السلفيين كانوا عاملين دوشة قبل الاستفتاء, عشان حوار المادة 2 والهوية الاسلامية 
لكن مثلا مسمعتش عن شيخ سلفي اتوجهت له الدعوة إنه يشترك في الحوار الوطني 
ومسمعناش دوشة إنهم بيقولوا إزّي مانشتركش ؟
هل عشان مش فارق معاهم, أهم حاجة الشريعة الاسلامية تفضل زي ماهي ؟ طب ماهو الحوار الوطني ده معمول عشان كل الناس تتكلم مع بعضها ونحاول نوصل لحل وسط يرضي كل الناس ؟ 
ولا هل مفيش حد يمثلهم؟
بـم انهم دايخين زي كل الناس برضه مرة اللي يقول غزوة الصناديق, ومرة اللي يكفر دول, ومرة اللي يقول نحرق الكنايس...
أم كاميليا على أم عبير!!!!
هنضيع بعض عشان واحدة؟  مش أول ما الاسلام ابتدى كانوا بيتعذبوا؟ نصيبها بقى ربنا بيحبها 
لو الكنيسة بتحبس الناس فعلا كده يبقى اسمه استهبال!
بس مش ده الحل! ليه مايترفعش قضية بناء على دليل؟!  والكنيسة تتفتش لو في أدلة ضدها؟
مش قصدي إن مش من حقهم يتظاهروا! بس حوار الفتنة الطائفية ده حوار تلم زرعه مبارك الزفت مابينا! 
ما المصريين عايشين مع بعض من ساعة الفتح الإسلامي , سمعنا عن كنيسة اتضربت ولا عن مسلمة اتححبست؟
ممكن نتجنب أي حاجة تدي فرصة لحد يستغل الموقف ويولعها زي ماحصل في  أمبابه

كان فيها مسيحيين 
مش عارفة هل عندي معلومات كافية إني أتكلم بـثقة في الجزء ده, بس أنا حقول رأيي
النظام السابق كان ابتدى يزرع أفكار في مجتمعنا في رأيي ماكنتش موجودة 
إن المسيحيين أقلية مش واخدين حقهم, وإن في جماعات اسلامية مطربصالهم  فا هم مش حسين بالأمان في بلدهم 
أنا كا واحدة مسلمة عمري ماحسيت إن ده صح, عشان أنا اتربيت مع مسيحيين في المدرسة وباعتبرهم كلهم اخواتي! كنا بنفطر مع بعض في رمضان وكنا بنعلق زينة الكريسماس مع بعض 
كنا نحضر فرح في كنيسة وعزاء في جامع
مابتددتش أحس بالأفكار دي إلا لما بعدت عنهم في الجامعة
وقت تفجير الكنيسة وقالوا مسئول عنها جماعة اسلامية
قلت يا رب لو اللي عمله كده بـاسم الإسلام فـأنا بريئة منهم
و ربنا ظهر الحق وطلع إن حبيب العدلي المسئول عن تفجير الكنيسة
لو ده مش دليل إن لعبة الفتنة الطائفية دي كان في حد ومازال عايزنا نلعبها قمال إيه ممكن يبقى دليل؟
مافيش حاجة ضايقتني زي لما سمعت إن المسيحيين في مصر بيطلبوا حماية دولية! نصارى مصر اللي الرسول وصى المسلمين بيهم!
حست في ساعتها إننا فشلنا فشل كبيير
المسلمين فشلوا إنهم ينفذوا وصية سيدنا محمد )صلى الله عليه وسلم) وما قدروش يحسسوهم بالأمان 
  والمسيحيين فشلوا بـانهم صدقوا إنهم فعلا مش في أمان
في حاجة كمان مضايقني! موضوع امبابة ده كان ممكن يتلم من نحيه من الاتنين 
يا المتظاهرين دول كانوا يلموا الدور ويتكلوا 
يا الكنيسة إن شله تدخل مندوب يشوف بـنفسه إن مفيش حد محجوز جوه 
رأيي الشخصي: سكوت الكنيسة ماكانش ممكن يتفهم غير إنها بتتجنب المواجهة وإن في فعلا ناس محتجزه جوه!
  الاتنين غلطانين 


كان فيها ناس بقى لسة دايخين يا عيني وبيقولوا اسفين يا ريس 
وفيها ناس عايزين يطبق العلمانية في بلد فيها ناس بتحارب عشان تدخل البنات امتحانات الجامعة بالنقاب! ومفهوم العلمانية عندهم هو اللي مطبق في تركيا اللي البنات مابتدخلش الجامعة بالحجاب أصلا 
فيها اخوان مسلمين (في رأيي الشخصي) محترفين تدويخ, طلعوا من اللعبة ولا اتهزوا, عمالين يتفرجوا عالناس بتقع فوق بعض عشان لما السكة تفضى يدخلوا زي القطر,   
فيها ناس زي كده لسة بيحاولوا يكتشفوا إيه الدور اللي ممكن يقوموا بيه في الفترة اللي جاية غير الكتابة على توتير :D

 
آخر حاجة عايزة أقولها ودي أهم حاجة :
السياسة زبالة 
لازم أبدا أبدا مانستبعدش حركات زبالة من أي حد
يعني مثلا 
مانستبعدش إن "فلول" النظام بتحارب بـايدها ورجليها عشان يرجعوا تاني
مانستبعدش إن في "قيادات" في الجيش نفسها تعمل انقلاب وتاخد الحكم 
مانستبعدش إن رجال دين "مسلم ومسيحي" يستخدموا ثقة الناس فيهم عشان يوجهوهم في اتجاه سياسي معيَّن 
مانستبعدش إن في "فئة" عايزة تشوه صورة الإسلاميين عشان الناس تتوجه للتيارات التانية الموجودة زي الليبرالية والعلمانية
مانستبعدش إن في شريحة كبيرة جدا من الغير متعلمين كل تيار سياسي بيحاول يستغلهم

وآخر حاجة
اوعوا حد يستبعد إني ممكن اتجنن قريب من اللي بيحصل في البلد :D


والله الموفق والمستعان  



 

انفلونزا التفاؤل

أنا عندي وباء وأحب ابلغ عنه وزارة الصحة 

اعراضه :

ابتسامة عريضة

عدم القدرة على تميز اللون الاسود

نشاط مثير للقلق في المخ والاعصاب 

ليس معروف بعد ان كان معدي أو ليس معدي 

وفي حالة إنه معدي , ليس معروف سرعة انتشاره

وانا قررت أسمي الوباء ده انفلونزا التفاؤل 

لاني حسيت اعراضه قريبة من اعراض التفاؤل 

أنا واحدة مصرية , روحت الاستفتاء , وقبل مروح قلت دعاء الاستخارة, وقلت لأ 

بس لما النتيجة طلعة نعم , وبنسبة 77%

واللهِ العظيم اتبسط أكتر مازعلت :D

طبعا أنتم بتقولوا عليَّ دلوقتي مجنونة :D

أنا اكمني واحدة مؤمنة بـربنا , مش كافرة زي ما بعض الاخوة المسلمين ,ربنا يجازيهم على فعلتهم دي , كفروني

لازم بوصل في خلاصة أي حاجة لمرحلة "قدَّرالله وماشاء فعل"

ساعات الواحد بيكون متأثر بحاجات تانية فـبيوصل للنقطة دي متأخر شوية 

بس عشان أنا تقريبا كنت متاثرة بحلاوة أم الطابوراللي كنت فيه , وصلت للنقطة دي بسرعة عن العادي

نجاح النعم وبالنسبة دي, وبنتيجة ساحقة في المحافظات والاقاليم ...

دي أكتر حاجة , في رأيي الشخصي , ممكن تفيد مصر في الفترة الجاية!  

أكتر من دستور جديد!!!

 

إنت لو واحد قلت لأ , وشفت الجدول ده

واللهِ لازم تتبسط :D

ركز كده فيه, وحاول تحلل الأرقام دي لحاجة تانية غير معناها الحقيقي 

171,190

    صوت باطل, اكترهم فالمحافظات الكبيرة (القاهرة -الإسكندرية - الجيزة ) ا

وفي المحافظات دي برضه النسبة بين النعم ولا مش كبيرة, يعني فالقاهرة نعم 60% ولأ 40

لاكن في محافظة تانية, اللي نعم واخدة 80% و90 

أراهنك على أي حاجة المحافظة ديه من المحافظات اللي فيها أكبر نسبة أمية وأكتر انتشار للإخوان وحصل فيها استغلال للناس !!!

واللهِ العظيم الجدول ده منجم دهب, بس للّي يقدر يفرق الدهب من النحاس 

الله وحده اعلم طبعا بس أنا حاسة إن هو ده اللي حصل :

ربنا حب إن أنا و 4 مليون زي يقولوا لأ , عشان يبان إنه في رأيي تاني في البلد 

وحب برضه إن يبقى في 14 مليون يقولوا نعم وبالنسب المضحكة دي 

وقبل كل ده كمان , حب إن الجيش يعمل تعديلات الاول مش يخش على دستور جديد على طول 

النتيجة دي فكرتني بمتش الأهلي وبرشلونة  =D

الاهلي طالع بطل دوري وماحدش قده 

راح لاعب برشلونة و اخد على دماغه 4-1

شباب مصرعملوا ثورة من على الفسيبوك  انبهر بيها العالم 

ولما سابوا الفسيبوك ونزلوا الشارع عشان الاستفتاء , اخدوا على دماغهم من بتوع الشارع

اللي يعرفني يعرف إني من أول ماقالوا استفتاء وانا بقول توعية توعية , احنا هنا في وادي والناس اللي في الشارع في وادي تاني 

اتكلموا مع أي حد, سواق التاكسي, الراجل بتاع الكشك

ولكن لا حياة لما تنادي 

والمصيبة الأكبر إن الناس أول مالنتيجة طلعت:

إزّي؟ ده أنا كل اللي حوالية كانوا بيقولوا لأ, ده أنا واحد بس عندي كان حطت نعم الخضرة والناس استلمته؟ طب إزاي؟

اقولك إزّي :

احنا كان عندنا سيناريو رئيسي من اتنين :

واحد مرسوم له خطة زمنية (نعم)

وواحد مش مرسوم له خطة زمنية (لأ)

هنفترض إن إنت شرحت الاتنين بـصدق , من غير أصلا الش هيخلوها اسلامية احييي ومن غير الش هيشيلوا مادة 2 الى الجهااااد

أنا شايفة إنها حاجة طبيعية إن واحد مش متعلم, أو مش متعلم كويس أو سنه كبير هيختار الحل الواضح واللي بالنسباله امان

ده غير إني زي ما قلت نعم فيها اجابيات وسلبيات و ايجابياتها كافية إنها تقنع ناس كويس! ومش كل واحد بيفكر زي التاني ! ماكانش بقى في حاجة اسمها ابتكار !

يعني مش كل 77% قالوا نعم عشان هم مقتنعين زهنيان بيها! 

واللهِ العظيم ربنا ستر 

تخيل كده الجيش مكنش عمل تعديل دستور, وكان عمل دستور جديد على طول, في الأغلب مكنش أصلا هيغير حرف في المادة 2, احتمال كان عمل مادة بالنسبة للديانات التانية بس مش أكيد, وجه عمل استفتاء! المادة 2 زي ماهي مفيش حاجة تضايق اخواتنا السلف اللي هم مضايقين نفسهم أصلا!

كان ال18 مليون أو أكيد أقل راحوا وقالوا نعم 

كنا هنقول هييييه ديمقراطية 

اتهارينا في الطابور بس مش مهم 

وجت انتخابات مجلس الشعب, أو احتمال الرياسة

و تكتشف فجأة بـنتيجة فيها اغلبية ساحقة  لفلان

كنت هتقول أنا مش فاهم إزاي؟ ده أنا كل اللي حواليا مختارين علان :D 

كنا هنلبس برلمان أو رئيس زي الفل :D

دلوقتي الوضع اختلف! 

دلوقتي كل الناس اللي كانوا مضيعين وقتهم في انهم يحطوا لأ وتؤ ولع بقوم بيقولوا انا من بكرة هانزل الشارع والمحافظات

دلوقتي الأحزاب الجديدة اللي أنا نفسي تلحق تتعمل عشان حاسة انهم هيكونوا أحسن ناس تمثلني في مجلس الشعب , بدل ما كانوا لسة هيعملوا دراسة مثلا هننزل فين وهنقول ايه للناس طب نكلمهم بـأنهي اسلوب؟ 

الجدول أهوه! أحسن دارسة ممكن تتعمل وعمرهم ماكانوا هيوصلوا لنتيجة زي دي في سنتين حتة! 

لو الناس دي بتفهم, يكونوا فاتحين مقر في المحافظات دي قبل مايفتحوا في القاهرة والجيزة والاسكندرية

جماعة الاخوان المسلمين :

الله يرحم السادات ! كان زمانه مابيقولش غير الجملة دي الكام شهر اللي فاتوا دول 

هؤلاء يجب أن يحاكموا بـتهمة الغباء السياسي 

ودين أمي اللي النهارده عيدها دي, الإخوان مش هايمسكوا الحكم اللي هم مش متراشحين له أصلا!!! ده مستحييييل في بلد فيها مارينا وسانجريا وحفلة عَمرو دياب بـ300 جنيه

ولو مسكوا حكم البلد بعد 5 أو 10 سنين مثلا, البلد ممكن تختفي منها شوية حاجات, زي الدعارة مثلا, بس مش هتبقى اسلامية زي السعودية

الاخوان عملوا حركة غبية هيندموا عليها العمر كله 

 

اللي حصل كل اتي :

أول ما مبارك الله يجحمه غار, في ناس معينة كده بدأ لسانها يدلدل زي الكلب اللي شاف حتة لحمة , منهم الاخوان  ومنها ناس عايشين بره مصر ومولعينها من زماان (أظن واضح مين)

بدأت شلة مكونة من بعض الاغبياء تقول عايزين نشيل المادة 2 من الدستور

راح رد عليهم بعض الاذكياء قالولهم انسوا 

راحوا قالوا لو قلنا نعم الاخوان هيكسبوا ومش بس هيسيبوا المادة 2, دول هيخلوها اسلامية 

راح الاخوان قال لك, ياولاد اللذينة , عايزين تضيعوا علينا الانتخابات اللي اتفاحتنا عشان نكسبها في يوم من الايام! 

في نفس ذات الوقت في شوية ناس لوزاز مابنشوفهمش كتير عشان هم أصلا بيقرفوا مننا اسمهم السلفيين !! نفسهم ومن عنهم يجاهدوا في سبيل الله! مع إن الحدود ما بينا وما بين فلسطين وليبيا مفتوحين دلوقتي, بس هم قراروا يقعدوا ويجاهدوا  هنا في سبيل الحفاظ على المادة 2 اللي هيا اساسا ضمن دستورمعطل من يوم 11 فبراير

في الأساس للي ميعرفش , السلف بيكرهوا الاخوان ... عشان الاخوان كول شوية :D

بس يا سيدي الاخوان والسلف لقوا مصلحة مشتركة فبقم أصحاب وحبايب!

وده اللي الاخوان هيندموا عليه

الإخوان في ناس كتيرة كانت فتحت صفحة جديدة معاهم, ولكن هم كتبوا أول سطر في الصفحة ديه "الضحك على عقول الناس وتخويفهم" 

مش هقول بالدين عشان أنا مشفتش بـنفسي تخويف بالدين من الاخوان , شفت تخويف بعدم الاستقرار 

لكن اللي خوف بالدين هو السلف, وعشان توافق المصالح ده ناس كتير نسبت تخويف بـالدين للاخوان

 وبرضه دي حاجة تخليك تتفائل! كارت التخويف ده اتحرق خلاص, من عند اللي لطموا وقالوا الاخوان ومن عند الاخوان اللي قالوا استقرار !!!

وكارت التخويف ده اوسخ كارت سياسي , وإن شاء الله ها نمنع حد إنه يستخدمه تاني.

تخيل بقى الكارت ده كان أول استخدام ليه كان في انتخابات مجلس الشعب أو الرئاسة ؟ 

=D

التزوير:
إنت لو كنت رحت انتخابات مجلس الشعب مكنتش اتضايقت إنك سمعت خبر عن تزوير في كام لجنة, ليه بقى!؟
أنا روحت انتخبات مجلس الشعب 2010! 
مكنش عندي أي فكرة اروح فين! 
رحت لجنة تحت بيتي بالضبط, وده كان شيء منطقي, ساكنة في شارع حسين واصف, يبقى ألاقي اسمي فاللجنة اللي في شارع حسين واصف! 
رحت لجنة مدرسة عبد المنعم رياض, قال لي روحي اسألي في قسم الدقي, قالولي  روحي مدرسة جمال عبد الناصر! يعني عاديت على 3 لجان من الساعة 8:30 للساعة 9:30 ! مشفتش مخلوق واحد بينتخب, مش طابوور ! لقيت تلاتة في آخر واحدة روحتها , واحدة منهم صاحبتي اعرفها :D
والله العظيم زي ما باقولك كده!
لو حصل تزوير في لجنة من دول, كانت تبقى مصيبة!
لما يكون مليون واحد انتخابوا, وإنت تزور صوت 10,000 منهم في كل لجنة , يبقى انته  بتزور بـنسبة 1  % في كل لجنة
ولما كل اللجان تتزوار تطلعلك نتيجه زي 99% دي
التزوير ده منسوب للحزب الواطي, والحزب الواطي لسة موجود! يبقى إزاي تتوقع إنه التزوير هيختفي!؟
بس لما التزوير من 5 شهور كان 99%, ودلوقتي بقى 5% أو 10 % حتة, دي حاجة أظن نقدر نتغاضى عنها 

والقضاء ما انكرش إن كان في حالات تزوير, وفي لجنة بالكامل في المنيا بطل صوتها !
بس دي أول تجربة ليهم يكونوا مسئولين عن الرقابة, الضغط كان غير متوقع والفترة اللي كانت عندهم عشان يجهزوا فيها ماكانتش طويلة!
فـا حتى لو في تزوير لقيناه في كام لجنة, فاحنا نقدر نسامح المرة دي,  لإن تأثير اللجنة المرة دي لا يتعدى ال0.2%
 ولكن مش هنسمح باي تزوير في اللي جاي  ولو بـ 0.0001% 
عشان كل واحد من اللي جاي هيكون قرار مصيري 

الاستفتاء على التعديلات ده كان ماتش ودي كل الناس اتدربت فيه! 
اللعيبة والحكام وقنوات الكورة والمشجعين
وإن شاء الله كل حد هيتعلم من اخطاؤه عشان ماتشات البطولة جاية خلاص 
 

واللهِ خطة ولا أحسن سياسي يقدر يحطها! ربنا وحده بس هو اللي قادر عليها  

ها؟ اقتنعت ولا لسة إن النتيجة لما طلعت نعم و بالمنظر ده حاجة تدعو للتفاؤل !!

ملحوظة :

أنا بصه عالنص المليان من الكوباية!
بس بصه عليه من قعر الكوباية فـأنا مش شايفة النص الفاضي أصلا 
=D

تعالوا بصوا معايا بقى 

إيه الحلاوة دي ؟

أنا عمري في حياتي ,لا في مصر ولا بره مصر , شفت للي أنا شفته النهاردة 

أنا النهارده اتعلمت من أول وجديد يعني إيه ... طابور 

=O

الطوابير الي عمري ماهنساها في حياتي:

: طابور في الحرم قدام الحجر الاسود

كنت في عز الصيف والطابور 20 واحدة بس مثلا, جيت خلاص كان فاضلي واحدة قدامي, راحت جت واحدة من الزنوج اديت الستات كتف شمال والرجالة كتف يمين وفي لحظة بقت في حضن الحجر وانا بقيت عند باب الدخول تقريبا

  :  في امريكا "six flags"طابور في ملاهي

أنا و أختي وقفنا ساعة في طابور لعبة سوبر مان, واللعبة طلعت عبارة عن قطر بيطلع على ارتفاع عمودي رهيب وينزل تاني. اللعبة كلها على بعض أخدت 20 ثانية . بس ماتضايقتش من الوقفة قوي عشان كانت تستاهل

:  طابور الاستفتاء على التعديلات الدستورية

أنا واللهِ العظيم كان هاين عليَّ آخد الكام ألف اللي كانوا واقفين معايا بالحضن.

حظي المهبب إن أنا وأصحابي كنا بايتين عند واحدة صاحبتنا في الشيخ زايد

فـعشان احنا بنات جامدة اوعى وشك فتحنا الويب سايت وجبنا منه اقرب لجنة , طلع في واحدة بس في الشيخ زايد

روحنا تاني يوم الصبح بـكل ثقة

لقينا ناس واقفة طابور زي الفل 

بس إن احنا نلاقي أول أمه!!؟؟

:D

أقسم بالله مش ببالغ 

أنا وقفت في طابور طوله 1 كيلومتر , أو أقل سنة بسيطة 

وصلنا لآخر الطابور 11:30

طلعنا من باب اللجنة بنقول اشهد أن لا إله إلا الله ... الساعة 2:10

أحب اقول للّي راح لجنة سريعة وخلص في 10 دقايق ... إنت فاتك مشهد ولا كنت تتخيل تشوفه حتى في الأحلام

هاحكيلكم حبة من اللي أنا شفته

 مبدئيا احنا كنا رايحين في عربيتين

 فـا احنا حبة وقفنا, وبقتنا كانوا ورانا بـلحظة, الطابور اتملى ورانا

اتكسفوا ينطوا الناس ويجوا يقفوا معانا

فضلنا الساعتين ونص واقف مبينا بتاع 20 شخص

المدرسة سورها  مربع 

فا في أول جنب كانت الدنيا ضلة وطرااااوة

 لفينا الكورنر وبقت الشمس عمودية فوق نافوخنا وفضلت كده لحد ما روحنا

 بدأ العطش يسيطر علينا من هنا, فجأة لقينا ناس , مقدرش اقول عليهم غير ولاد حلال بجد, بيلفوا عالناس بـكراتين مية 

:O 

طبعا شدينا ازازتن مفضلش فيهم نقطة! 

ولماعطشنا تاني لقينا ولاد حلال تانيين بيوزعوا ... وهكذا! 

خدوا بقى المنظر ده :

راجل مسن بـعصاية ... بيدور على آخر الصف 

منظر تاني: 

اب وأم معاهم طفلين واقفين ورانا بحبه كده , الراجل اللي قدامنا شافهم , قالهم على فكرة اللي معاه أطفال بيدخلوه من غير طابور 

الاب قال له طيب لو رحت ومرضيوش ؟

حوالي 10 أشخاص مالهمش علاقة بـبعض قالوا في نفس النفس ... 

تعالى هنا تاني خد دورك 

منظر تالت:

كنت رحت اركن العربية ناحية الباب عشان كنت حاسة مش هنقدر نرجعلاها, وكان إحساسي في محله :D

وانا راجعة بقى لمكاني في الطابور 

لقيت دوشة وزحمة في حتة

كل اللي سمعاة "إنت مالكش دعوة دي حاجة شخصية "

بعد ترقب وتأني عرفت اللي فيها

الأوربت كانت عايزة تصور مع الناس في الطابور تسألهم هيقولوا إيه 

ولكن طبعا عشان الناس بقوم أصحاب خلاص من غير مايعرفوا أصلا التاني هيقول إيه في الاستفتاء (من كترالواقفة يعني) كلهم قالوله إنت سألت ناس كتير قبل كده, ماحبكتش واحنا داخلين خلاص تعملينا مشكلة وتهيج الناس على بعض والجيش أصلا مانع الحوار ده فـإمشي قبل مانندهه...

يخرب بيت ده وعي يعني :D

منظر رابع :

وصلنا لباب المدرسة , قلنا اخيرا وصلنا 

إنت بس تعدي الباب الحديد ده, وتشك للحظة في نفسك إنك دخلت دريم بارك وواقف في طابور الصاروخ 

تقريبا عشان جوه ضلة, في ناس , مقدرش اقول عليهم غير ولاد حلال برضه , عملوا طابور جوه المدرسة لافف زي بتاع اللعب, مفيش حديد ولا حبل حتة , بس الناس كلها التزمت به .

منظر خامس :

وحنا واقفين في الطابور الحلزوني ده , سمعنا دوشة جاية من عالباب ورانا , واحد بيقول أنا هخووش يعني هخووش . بعد التساؤلات يمين وشمال , اكتشفنا إن لسة في ناس عندها خلل في مخها, متخيلين إنهم هيعرفوا يدخلوا زي زمان ... براشوت 

راحت واحدة صاحبتي , الحر جايب اخرها, قالت : خليه يخش وانا هاشده من شعره . لقينا واحد من اصدقائنا في الكفاح اللي كانوا ورانا من أول  موقفنا في الطابور بيقولها وانا هالطوشه بالألم على وشه! :D  

منظر سادس  :

ودي حاجة اثرت فيا

دخلت اللجنة أخيرًا , و وأنا واقفة على طرابيزة الستات لقيت ست أخدت واحدة منقبة على جنب والمنقبة كاشفتلاها النقاب , رجعت الست قالت للراجل مظبوط . 

أنا ماصدقتش نفسي الصراحة !! 

بس وانا لسة واقفة في الدوراكتشفت إن الست دي مش تبع اللجنة أصلا !

عدى من جنبي راجل ملتحي ومراته منقبة 

وهنا بقى كنت هاعيط من الاحترام بجد!

القاضي  اللي هو مشرف على اللجنة نده الراجل قال له : بص , معلش الراجل اللي قاعد عالطرابيزة  هياخد بطاقة المدام وهيديها لواحدة من السيدات تكشفلها وشها عشان نتأكد إنها هي...

طب طالما الموضوع بالسهولة دي, ليه كانوا لازم يطلعوا عين اللي خلفوهم ؟

منظر اخير   :

الله أعلم جابوا العزيمة دي منين, كان في مجموعة اسمها "لجنة نظام" ناس تطوعت عشان تظبط النظام! هم اللي كانوا بيدخلوا الناس, مش الجيش ولا الشرطة, كانوا عاملين كردون ناحية أخر الطابورعشان ماحدش ظريف ييجي يحشر نفسه, يجي حد خارج يقولك معلش بعد اذنك عشان توسعله يخرج ... حاجة كده تفرح القلب

بغض النظر عن الحر وضربة الشمس , ولكن ده أحلى طابور وقفت فيه بجد!

ومهما كانت النتيجة, ومهما كانت التخوفات اللي كانت عندنا قبل الاستفتاء حقيقية , فا أكيد الشعب اللي اتعلم وعلمني في يوم إزّي اقف في طابور مش هيسيب حد يضحك عليه ولا يحتكم فيه

وملحوظة : كل الورق كان مختوم بالختم, اللجنة كانت زحمة قوي مدخلتش ورا الستارة بس كتبت على طرابيزة في الجنب ماحدش كان شايفني واللجنة كان فيها الاقلام اللي بنكتب بيها من سنة أولة حضانة (البيضة الرفيعة أم غطة أزرق) , الراجل اخد مني البطاقة وأدهالي لما شاف الحبر الأول , كان في نوعين من الحبر, واحد متبتت زي بتاعي, وواحد خف قوي أول ماتغسل بالمية, بس ماراحش  تماما, الصندوق كان مليان جيدا :D 
من ال آخر, كله كان في السليم  

ولو لم أكون مصريا لودت أن اكون مصريا بقى 

وتحيا مصر يا عم 

:D 

و آدي الضمان

وده منظري بعد ساعتين من السياحان

جمهورية لاعم

أنا بحسد الناس اللي أخدت قرار نهائي في موضوع الاستفتاء ده 

فعلا الله يرحم مبارك, ماكانش بيحيرنا

ولا الحزب الوطني, كان بيقولك متتعبش نفسك وتنزل أصلا

كالعادة  ده رأيي الشخصي 

بس الموضوع مستحيل يكون بالسهولة دي

إن الناس تبقى لأ 100% ونعم 100% ولا إيه ؟

احنا بنتكلم فقرارممكن يأثر على مصر ال100 سنة الجايين

مش متخيلة الصراحة إني ممكن آخد قرار كده بمنتهى الثقة دي

يمكن عشان دي حاجة فيا أصلا, دايما بفكر فكل الإحتمالات

ودايما بحب آخد رأيي حد بيفهم أكتر مني 

  وهنا بقى يكمن اساس المصيبة اللي أنا فيها

اني سمعت للرأيين , والإتنين بيفهموا

أنا هاقول اللي وصلتله لحد دلوقتي على سبيل الفضفضة مش عشان اقنع حد بحاجة, لإن أنا أصلا لسة مش مقتنعة

نعم 

من أهم الحاجات اللي تخليني اقول نعم هي إن:

حسب ماسمعت من كذا حد في اللجنة الدستورية, الدستور االقديم معطل أصلا , ودي مش تعديلات عليه, ولكنها زي قواعد للفترة الانتقالية 

الفقرة المضافة تلزم مجلس الشعب والشورى بـانهم هيعملوا دستور جديد وهم اللي هايختارو اللجنة التأسيسية

لو التعديلات مشيت هيبقى عندنا رئيس في مدة 6 شهور ودستور جديد في مدة 8 - 9 شهور 

الدستور الجديد ده هيخلي في انتخابات مجلس شعب تاني بعد مالناس توافق عليه ويتفعل 

مميزات:

• اهمها سرعة الاستقرار و وضوح السكة اللي هنمشي فيها

• اللي هيترشح في الانتخابات الجاية هيبقى عارف من اولها إنه مش مكمل ولازم يدخل انتخابات تاني, فـالناس اللي محوشه نفسها للكبيرة هتبان ,من الآخر كده

كده كده هيبقى بيتعمل دستور جديد بس بعد الانتخابات 

عيوب:

• لو دي قواعد مش تعديل ليه مفيش مادة بتحدد سلطات الرئيس ؟  اينعم ماحدش ها يتجرأ يعمل حاجة ضد مصلحة الشعب اليومين دول بس برضه ليه ادي كل السلطة دي لشخص واحد 

• مفيش فقرات نقدر بيها نحاسب الرئيس. ممكن حد يقولي دي بعدين , بس أنا شايفاها لازم من دلوقتي , عشان اللي أوله شرط اخره نور 

• الاخوان المسلمين ...

أنا حاسة إن الاسم ده بقى كل ما يتقال, في مزيكا بتشتغل عند الناس زي اللي بنسمعها في الأفلام الاجنبية لما الراجل الشرير يظهر لأول مرة في الفيلم

على فكرة الاخوان مش بعبع , ومنهم ناس أعرفهم شخصيا, ولا ملتحين, ولا بيلبسوا عبايات أو نقاب, وعلى عكس السلف مثلا فيهم ناس كتير جيدا متوسطة في الدين  (ده برضه مش معناه عندي حاجة ضد السلف, دول ماشيين على مذهب وكل واحد يعمل اللي عاجبه) 

وأهم حاجة بقى إن الاخوان ... قوة سياسية

أوباااااااا 

يعني الاخوان مش خالية ارهابية ولا ماشين بالكرباج بيقيموا الحد؟

تصدق لأ !!! دي كانت القصة الخزاعبالية اللي كان امن الدولة بيحكهالنا كل يوم باليل قبل ماننام

الحق يتقال ... الاخوان كا منظمة سياسية كانوا أكتر ناس خبطوا ورزاعو في النظام وفي الحزب الوطني

البردعي كتر خيره قال تغير ودي حاجة تتحسبله , بس ماهو الاخوان بيقولوا تغيرمن زمان برضه

بس الفرق البرادعي بقى بطل والاخوان بقوم "يالهوييي, هايمشونا كلنا بالنقاب"

من الآخر أنا شايفة إن صورة الاخوان كانت مشوهة وتظلمو كتير 

بس ....

ده مش معناه إني اسبلهم البلد , وده اللي هيحصل لو انتخابات مجلس الشعب اتعملت كمان شهرين , وبالرغم إنهم قالوا مش هيترشحو إلا لتلت المجلس... فا فالأول وفي الآخر دي قوة سياسية يعني التحوير ده عادي

ليه بقى مش عايزة الاخوان يسيطروا ؟

علشان بـكل بساطة ده مش بيعكس الواقع

الشارع المصري مش اغلبيته مع الاخوان

والناس دي لسة مش لاقية اللي يمثلها 

الاخوان عايزين دلوقتي عشان عايزين السلطة

واللي عايزين ياجلوا برضه عايزين السلطة 

 ماحدش يعني ملاك  بجناح عشان دي سياسة 

لكن إيه اللي في مصلحتي ك مواطنة ؟

إن يبقى في قوة واحدة مسيطرة على مجلس الشعب ؟

ولا إن يبقى في قوتين والاتنين يخبطوا فبعض, بـطريقة ديمقراطية طبعا, وتطلعلي أحسن نتيجة كا مواطن؟

عشان كده أنا شايفة دي من عيوب النعم

, سلطة زيادة لمجموعة واحدة لاتمثل واقع الشارع المصري كامل 

ولو كانت المجموعة  دي حد تاني غير الاخوان كنت هاقول نفس الكلام

 لأ

من أهم الحاجات اللي تخليني اقول لأ :

ليه في تحوير على أم المواطنين ؟ ليه الفقرة الاولي من المادة 189 بتقول يحق والفقرة المكررة بتلزم 

أنا دلوقتي واحدة مليش أوي في القانون, لما قريت الاتنين ورا بعض كده , حسيت إن ممكن قوي ميتعملش دستور جديد.

وطلامة المواد دي انتقالية , ليه ماتسامتش دستور مؤقت مش تعديلات؟

الصراحة حالة الغموض دي وسكوت الجيش, رغم إنه عارف في حالة دواخان في الشارع, كافيين جدا اني اقول لأ 

مميزات:

• دستور جديد يعني تأجيل الانتخابات, يعني وقت عشان طفل الحياة السياسية اللي اتولد ده يقدر يكبر ويتعلم فيه!

وانا مش بتكلم عالاحزاب اللي موجودة من قبل كده, لإن الصراحة كنت بشوفها ديكور عمله الحزب الوطني

أنا بتكلم عن الشباب , والناس اللي اتساكتت بالعافية والناس اللي اطردت... الناس دي تلحق تعمل كيان سياسي يمثل بـنسبة كبيرة الرأي العام في الشارع

• دستور جديد يعني نبتدي على بياض, زي ما قلت على شفيق , ولونه هييجي هييجي, هي بس مسألة أمته

• وقت الواحد يتعلم سياسة برضه, بدل مانبقى ماشيين ببيقولك وبيقوللي 

:عيوب

• أكبر عيب إن لو ماوفقناش عالدستور هنبقى عاملين زي حد شاف الهدف بتاعه وبعد كده غم عينه ومشي يحسس 

لو اترفضدت التعديلات الموضوع هيرجع للجيش 

• ياأمة يعملنا تعديلات جديدة , أو دستور مؤقت , وبرضه يخلينا نكمل في الانتخابات 

• ياأمة هيقول هنعمل دستور جديد ويفضل الجيش ماسك البلد حكم عسكري لفتره الله وحده أعلم قد إيه 

• ياأمة هيقول هنعمل دستور جديد وهيبقى في مجلس ريئاسي

•  طب ياترى المجلس ده هيكون في مين ؟

• طب هيكون واحد منهم اخوان؟ بـحكم إنهم 12 مليون من ال45 مليون اللي مسمحلهم ينتخبوا؟
  

• طب لو الناس مش موافقة عالمجلس ؟

بالنسبالي ده أهم عيب!

وخصوصا إن بمنتهى السهولة في فتنة ولعت فكام يوم كده 

 , وإن كل واحد بقى عامل نفسه حاجة وبيفتي

فـا حالة "أنا مش عارف أنا هامشي إزّي" دي مجناني أنا شخصيا

• تاني عيب بقى مهزلة الاحزاب اللي بتحصل

   مرتضى منصور هيعمل حزب, عمرو خالد هيعمل حزب... وهكذا 

نيجي عالإنتخابات بدل مانكون اجلنا عشان يبقى في نضج سياسي في البلد 

  نلاقي ناس فالمجلس ملهاش في البطيخ ونرجع تاني لأزأزة اللب

  مش عارفاه يمكن أنا اللي عندي مشكلة :D

بس مش حاسة إن حوار الدستور ده ينفع يكون فيه قرار حاسم مثلا زي مبارك يقعد ولا يمشي ولا شفيق يقعد ولا يمشي 

الدستور ده أهم وأكبر من مليون مبارك

زي ما هو واضح أنا ماكانش قصدي اقنع حد بـحاجة لإن أنا مش مقتنعة لسة اصله

فـا ياريت تدعولي وتدعوا إن ربنا يهدي الناس للقرار اللي في مصلحة البلد

آخر حاجة بقى 

, دي أول مرة الواحد فينا يروح انتخابات يبقى عارف ان صوته هيتسمع

الملاحظة اللي لاحظتها 

  الناس اللي بتتكلم عالنت , اكترهم (مش أغلبيتهم) هيقولوا لأ 

والناس اللي بتتكلم في الشارع , اكترهم (مش أغلبيتهم برضه) هيقول نعم

فلازم نعرف إن النتيجة هتبقى قريبة جيدا 

 ومهما كانت لازم نتقبلها

ساعة المظاهرات ماحدش كان يجروء يقول استفتاء عشان عارفين رغم الامهات كانت بتولول عالتلفزيون عايزة ولادها يطلعوا من التحرير ومن اللجان الشعبية , لكن لو قلنالهم إيه رأيكوا بصراحة كانوا قالوا في داهية مبارك 

لكن دلوقتي الوضع مختلف , أغلب الناس كونت فكرة بنفسها عن التعديلات

    وهتروح تقول رأيها من غير خوف

يعني قصدي من الآخر لو النتيجة طلعت نعم, ماحدش ينزل ميدان التحرير ويتقبل النتيجة

   ولو النتيجة طلعت لأ, ماحدش يروح ماسبيرو ويتقبل النتيجة برضه

والله والي التوفيق 

على فكرة في موقع مهم جدا لجنة القضاء العليا عملاه للاستفتاء ,عليه معلومات عن التعديلات وعملية الاستفتاء هتمر إزاي  وكمان أماكن اللجان اللي ينفع تروح تدي صوتك فيها

www.estefta2.eg