يــــــاه
بقالي كتير ما كتبتش
اصلي كنت زهقت من كتر الكلام
و من كتر الخلاف
و من كتر انة ما فيش فايدة من اي حاجة!
انتخبنا مجلس شعب مش عارف يسحب الثقة من الحكومة
رجعنا الدوري عشان الناس تتلهي سييبوا عالعيال بلطجية خلصوا عليهم
عملوا قانون عزل سياسي اخيرا وبرده شفيق داخل الإنتخابات
فا قررت ان امتنع عن الكلام اللي ولا بيودي ولا بيجيب
و اركز اكتر مع
الصراحة Egyptian Sarcasm Society
لحد ما ننتخب رئيس و المجلس العسكري يغور من حياتنا يا رب
و لأنه خلاص فاضل 3 ايام و هشارك في اختيار اول رئيس مصري منتخب
قررت اخرج عن صمتي.....
انــــــا سعيـــــــــــــده :)
مش هنكر اني من شهر و نص كنت بفكر بسلبية و كنت عايزة اقاطع الإنتخابات
ده كان عشان ما كنتش مقتنعة بحد من المرشحين بنسبة %100
ولحد دلوقتي مش مقتنعة بحد فيهم بأكتر من %70
بس اول ما قررت اني خلاص عمري ما هبقي مقتنعة بحد و لازم انتخب
بذلت مجهود اكبر في إني اتعرف عالمرشحين
في اللي نسبتة زادت و في اللي نسبتة قلت
و الحمد لله, و قبل فترة الصمت اللإنتخابي بساعة, قررت هنتخب مين
و مقارنةً بالمرشحين التانين, مقتنعة بيه %100
قررت ان مصران شاء الله هتبقي "قوية" و"إننا" هنوصل ل "حلمنا" و هنحقق "نهضة" مصر
:)
انا حسة دلوقتي نفس احساسي قبل كاس العالم 2010
طبعاً كالعادة الفرقة اللي كان نفسي اشجعها مش في الكاس
مصر و لا مؤخذة
فا قررت اشجع اسبانيا
و كان نفسي تكسب
و لأني نحس :D
ولأن اسبانيا خرجت من كاس 2006 بطريقة غير متوقعة
قررت اني بعد اسبانيا هشجع الأرجنتين
و كانت اهم حاجة بالنسبالي ان ولا المانيا ولا البرتغال يكسبوا
دخلنا علي نص النهائي, الأرجنتين طلعت
و اسبانيا بتلاعب البرتغال
و هولندا بتلاعب المانيا
فا قررت ان لو هولندا كسبت برده هبقي مبسوطة
هولندا و اسبانيا لعبوا ضدد بعض و اسبانيا كسبت
:)
انا حبيت ابو الفتوح و نفسي يكسب
لنفس اسباب حبي لأسبانيا
منظم, طريقة لعبة بتعتمد علي اللعب جماعي, و دايماً بيهاجم
بس لو ما كسبش, هبقي بشجع بعده حمدين صباحي
لنفس اسباب تشجيعي للأرجنتين
فريق مليان مهاجمين و عمرك ما تتوقع هيلعب المتش إزاي
و لو ما كسبش, و لأني لازم اكيد هتفرج عالنهائي, هشجع لعب محمد مرسي
او بمعني أصح, هشجع بديع الفظيع
اهو علي الأقل هولندا فرقة منظمة كل لعيب فيها مصيبة, بيعملوا متشات جامدة بس لحد دلوقتي مش عارفين يكسبوا الكاس بجد
اي حد من دول هيكون بينافس ضدد عمرو "انا و الكاس حبايب" موسي او احمد "ايه" شفيق
هشجعة من كل قلبي و هتمناله التوفيق :)
ربنا يلطف بمصر
وإن شاء الله اسبانيا اااااا
قصدي ابو الفتوح يكسب
ما تنسوش تدعوا للشهداء قبل ما تنتخبوا :(
بسم الله الرحمان الرحيم
فالنبدأ فترة الصمت الإنتخابي
